مع دخول موسم الصيف أردنا أن ندخل على أعضائنا الأوفياء البسمة والبهجة المهم هذي الحصة من إعداد خوكم عبد الله وخوكم عادل الطيار نتمناو أنكم تستمتعوا بأسعد اللحظات للعلم أن الموضوع جبناه منا ومنا ومن عندنا يعني موش كل شيء من عندنا الحلقة الأول وهي تحت عنوان : البطالة والشوماج الشوماج في الحقيقة معندوش تعريف محدد وعلى هذا الشيء هبطنا للشارع وسقسينا بعض فئات المجتمع وكانت الأجوبة كتالي : الأول : الشوماج .... هو الشوماج !!! الثاني : الشوماج أمممممم هو عكس الخدمة الثالث : كي يكون البوطو خير مني معناها راني شومار على الأقل هو يضوي في الليل ..... قاعد يخدم يا سبحان الله زعما شومارة وميعرفوش أوموان واش معنتها الشوماج !!! شفنا واحد قاعد وحدوا رحنالوا خويا السلام عليكم وعليكم السلام صحا خو باي أنت خدام ؟؟ أنعم إيه مبصح الخدمة تتعب بزااااف ربي يكون فالعون برك والله حاجة مليحة كي تخدم ميهمكش التعب المهم راك خدام .. معليش تقوللنا واش تخدم ؟؟ تعب بزاف ديجا راني نحكي معاك بالسيف دركا معليش كوراج برك مي واش تخدم ؟؟ باش أيكون في علمك .... نعبي البرويطة بالقرافي ونطلعها للسانكيام ونزيد نهبط نزيد نعبيها ونطلع بيها ونزيد نهبط ....... نهار كامل هكا منحبسش كامل اااااااه ربي يعينك خويا بزااف صح !!! مي تبقى ديما خير مالقعدة أكيد وعندك بزاف وأنت خدام هكا ؟؟ لالا شحال عندك ؟؟ أوه أنت تاني غدوة نبدأ سبحان الله أتجي تفهم متفهمش إمالا متفهمش خير متفهم والو في بلادنا الناس كامل شومارة والناس كلهم خدامة أرواح أنت وفهم !!! نحبو نفهمو أكثر الشوماج في بلادنا ماعندوش علاقة بالفقر !!!! يعنى تلقى شومارا متهنيين برزقهم وقاعدين ومش كل خدام ماشي شومار في بلادنا كاين ناس تخدم في والو الوالو هدا : لما يروح للبيرو روطار (كان فالقهوة يتقهوى) كي يدخل يجبد جورنال ولا بورطابل سورتوا إذا كان عندوا 0661 منحكيوش ويشعل قارو وهاو مقسر للـ 12 يروح يتغدى ويقيل ..... ويروح فالعشية حسب القوسطو يا للبيرو يا للقهوة يديمن وهكدا كل يوم وزيد كاين خدمات تتطلب عبد واحد وبالاك طفل صغير لالا حنا يجيبولها شونتى كامل ويبقى واحد يخدم والجماعة تتفرج والكل يخلص عليها وعيش يا البلارج في بلاد الواقواق ولكان نكمل لحكايات تع الشوماج ماتخلاصش خاطاك راني شومار وفارغ شغل مالا اخطيونى
فكرة راااااااااااااائعة جدااااااااااا والجميل انه الجهد مشترك ومنسق بين اثنين ماتنساوش برك فهرسة الحلقات حتى مايفوتنا والو وعليا مهمة ابلاغ الاعضاء بكل جديد في المتابعة والاستمتاع دائما بحول الله بارك الله فيك اخي عبد الله وفي الاخ عادل الطيار ايضا
فكرة جميلة جدا ، ان نتطرق لمواضيع مهمة باسلوب المزح، نخرجوا شوية على المألوف و المصيبة في حكاية الشوماج انك تلقاه يوم كامل شاد الحيط و ما داير والو و كي تعرض عليه كاش خدمة ، يقولك انا نطيح بروحي و نخدم هديك الخدمة -والله غير يفشلوك- و المصيبة الأعظم انه يروح لأمه و يقوللها-واش لعجوز كاش ما ترمي علينا - بالمقابل كاين شباب بمقتبل العمر ربما يكونوا فتيان حتى، يخدم اي شي و تسمعه يقول انا كبرت و عيب عليا ندي مصروفي من بابا طرح مهم اسلوب متميز ، بارك الله فيكما اخواي عبد الله ،عادل الطيار بانتظارجديدكما
شكرا لكما سيداي موضوع جميل و بقالب أجمل ...طبعا يحكي عن حال فئة من الشباب الجزائري أو بالاحرى انتشار ظاهرة في اوساط الشعب الا وهي البطالة
نسأل الله العافية كلام من الواقع أختي سندس زاد شرف المنتدى بردك هذا وتشجيعك فبارك الله فيك وحفظك الباري .:.: أخوكم :.:.
أهلا اختي الكريمة القمر الحزين وهذا واش حبينا نوصلوه يااا نقولوا ربي يصلح لحوال وخلاص جزاك الله خيرااااااااا على هذا التواجد الرائع سلمك الله من كل مكروه .:.: أخوكم :.:.
مشاهدينا الكراااااااام أسعد الله أوقاتكم بالخير إنتظروا الحلقة الثانية من حصة كل شيء ممكن في بلادنا تحت عنوان مشكل السكن وهو عبارة عن حوار يدور بين السي عثمان وسي لخضر على اللوجما وهذه المرة رايح يكون زميلي العزيز عادل الطيار هو مقدم الحصة رايح انقوللكم حاجة بصح متقولوهالوش ( راهو مسكين حشمان ياو جامي قدم في التلفيزيون أس برك ) هيا يا خويا عادل متخليش الجماعة تستنا إنتظروووونا مزااال الكثيييييييير والكثييييييير
والله فكرة أكثر من الرائعة على الأقل نعرف واش يصير في بلادنا من مشاكل وصعاب وكيف نتخلص منها والاجمل أنها بأسلوب ترفيهي وهكا حنا نحبو المهم الله يصلحنا وننتظر الحصة بفارغ الصبر شكراااااااااا
صح نطرح المشكل ولكن المشكل ليس من اجل المشكل بل نحاول ان نطرح له حلول لان شبابنا اليوم تنقصه ثقافة الابتكار والبحث لاننا ورثنا هذه الفكرة على النظام الاشتراكي واحد يخدم و100 عابشة على ظهره . اما اليوم راه تبدل الذكر فالنظام اصبح راسمالي الكل يعمل وخصوصا الفكر العلماني الذي غزى العالم . اما فكرنا لم يتغير والسبب هو لم يجد الانسان الكقؤ الذي يغير هذا الشاب من شاب ينتظر الى شاب يبحث وياخذ بزمام الامور لنفسه ويتوكل على الله ولا ينتظر مساعدة من احد بل يجتهد ويثابر ويفكر ويخلق في نفسه حب العمل كما نرى في الدول المتقدمة. اما نحن اصبحنا نعتمد على الدولة فقط هي التي توفر مناصب الشغل . الفكرة مقبولة شكلا اما مضمونا فنطلب منكم ان تناقش بكل عناية ولا نعبث بمشاعر الشباب لان اهل المنتدى ممكن ادرى بمشاكل الشباب فتطرح قضاياهم وتعطى الحلول الممكنة اما ان نفشي اسرار الناس بدون فائدة فهذا ليس مقبولا شكر
مرحبااا بك خويا رفيق في حصة كل شيء ممكن جزاك الله خيرااا هذا التعليق الذي يخدمنا كثيرااا واللي من خلاله نقدروا نهزوا الفكرة ونديروا بها حلقة ما عن قولك أننا نفشي أسرار الناس فهذا غير مقبول يا خويا رفيق هل عند قولنا أن الشباب يعانيو من مشكل البطالة أننا دخلنا في أسرار الغير ؟ هل عند قولنا أن المواطن الجزائري يعاني من السكنة أننا فشينا أسرار الناس ؟ يجب علينا أن نحترز لما نقول ونعرف ماذا نقول وفي الاخير بارك الله فيك على هذه المداخلة