كيفكم بنات ،إن شاء الله تكونوا بخير ؟؟ كنا شفنا في الدرس الأول بعض الغرز البسيطة و لكنها مهمة جدا في التطريز بشكل عام و التطريز بالحاشية بشكل خاص اليوم إن شاء الله راح نشوفوا غرز جديدة و تقنيات جديدة حتى نزيدوا في تنمية معرفتنا وتتوسع أمامنا اختيارات العمل و بالتالي نتمكن اكثر في تطبيقات فاخترت اليوم نعملوا سلة ازهار ننقل الرشمة على القماش و نبدأ في العمل على السلة نعمل بشريط 0.5 سم بني اللون و بهذه الطريقة نعملوا un passè plat simple لكن بالشريط اللي ما تعرفش le passè plat simple هذا شكل تخطيطي للغرزة و نتحصل على هاذ الشكل كملنا العمل بالطول نعقدوا الشريط ونقطعوه ثم نحرقوه باش ما ينسلش ثم نعاودوا ندخلوا الإبرة لكن هاذ المرة قريبة من قاعدة السلة كيما راكم تشوفوا في الصورة ثم نخدم بالشكل الموضح في الصورة ، خيط ندوه و خيط نخلوه و هكذا .. لما نوصل لآخر صف ندخل الإبرة في القماش و انتقل لخط العرض الثاني نخرج الإبرة على بعد نصف سم من النقطة اللي دخلناها منها و نخدموا بنفس الطريقة خيط ندوه و خيط نخلوه لكن هاذ المرة نعكسوا الخيوط اللي ديناهم من قبل نخلوهم و اللي خليناهم ندوهم و الصور راح ان شاء الله توضح الفكرة و نكملوا العمل نتاعنا فنتحصلوا على هاذ الشكل ذو المربعات لم ننتهي بعد من السلة لكن نخلوها جانبا و نبداو في عمل الأزهار راكوا تلاحظوا انه بعد ما خدمنا السلة لم تعد الأزهار ظاهرة، مش مشكلة عندنا صورة الرشام اللي بيها رايحين نستدلوا على أماكن الأزهار و الأوراق إذن لنبدأ العمل عندنا نوعين من الأزهار في السلة النوع الأول و اخترت تكون ازهار شقائق النعمان نقطعوا من الحاشية الحمراء اللون واللي عرضها 1سم حوالي 15 سم نحرقوا الجوانب ثم نجيبوا خيط و ابرة نتاع الخياطة و الخيط يكون بنفس لون الشريط و نعملوا غرز صغيرة متقاربة un point de devant ثم نشد الخيط فيتكمش الشريط نعطيلوا الشكل الدائري و نخلي فراغ في الوسط القطر نتاع الفراغ يكون على اكثر تقدير 1 سم ثم نغلق الدائرة بخياطتها غرزات رقيقة و غير ظاهرة نخدم خمس زهرات و نحاول نحطها في مكانها داخل السلة طبعا استعين بالرشام باش نعرف اماكن الأزهار العمل على الأزهار لم ينتهي بعد يلزمنا نخدموا قلب الزهرة و على هذيك نجيبوا شريط 3 مم ( رقيق) blanc cassè و نخدموا الغرزة الفرنسية point de noeud عند حدود الدائرة فقط ما نعمروش كل الفراغ و نزيدوا نجيبوا شريط 3 مم لكن باللون الأسود و نكملوا نعمروا الفراغ اللي قعد و تخرج النتيجة بهذا الشكل رانا انتهينا من النوع الأول من الأزهار ننتقل إلى النوع الثاني و اللي رايحين نخدموهم بغرزة جميلة جدا و مهمة في عالم التطريز بالحاشية le point de ruban japonais يمكن ايضا نستعين بكروشي مثلا نحطوا تحت الشريط باش يعطي انتفاخ للزهرة لاحظوا كيف ان الإبرة راح تدخل في الشريط اولا و من ثم القماش، نجبدوا الشريط للتحت بهدوء حتى نتحصل على الشكل اللي رانا حابين و في وسط الزهرة نعملوا بعض غرز point de noeud بشريط اصفر عرض 0.5 سم و النتيجة اللي وصلنا ليها لحد الآن هي هذه نكملوا عملنا الأغصان اللي نخدموها بـ غرزة الغصن او point de tige هي هذا و هذا نعود إلى السلة و نعمل اليد نتاع السلة بغرزة الغصن لكن بالشريط و ليس بالخيط بنفس الشريط اللي عملنا بيه السلة نخدموا اليد نتاع السلة و بنفس الشريط و نفس الغرزة نعملوا أسفل السلة الجهة الظاعرة للعيان نعملوا الان على الأوراق بنفس الغرزة اللي استعملناها في الزهرة الثانية pt de ruban japonais نستعين بالرشام باش نشوف الأماكن نتاع الأوراق نخدم كل الأوراق بشريط 1 سم أخضر اللون بقاو الغصينات اللي راهي ظاهرة نخدموهم بغرزة يقولولها point d'épine و هاذي رسمة توضيحية للغرزة نكمل هكذا كل الغصينات اللي مرسومةو فوق كل غصينة نعمل un pt de noued و الشكل النهائي اللي رايحين نتحصلوا عليه نلخص مجملا واش شفنا في الدرس -عرفنا كيف نعملوا سلة -خدمنا زهرة شقائق النعمان -تعرفنا على الغرزة المهمة جدا le pt de ruban japonais -شفنا كيف استعملنا غرزة الغصن بالشريط و خرجت لنا يد سلة جميلة جدا -و في الأخير شفنا le pt d'épine و اللي ما يقلش اهمية من باقي الغرز اللي شفناها و راح تشوفوا كيف ان هاذ الغرز تتكرر في كل مرة مع زيادات اخرى اتمنى ان الدرس يكون عجبكم و اتمنى اكثر انكم تستفادوا منه نلتقي عزيزاتي في درس آخر في فرصة اخرى في آمان الله
يعطيك الصحة أختي سندس عمل متقن وشباب . باين بلي الخدمة تع الدرس الثاني راح تكون ممتعة ومفيدة كيما تع الدرس الأول .
السلام عليكم درس رائع و ممتع بارك الله فيك واقيلا مازال نتعاقب على التأخر ههههه تاع الدرس الأول باقيلي تركاب لوريدات مازال مدرتهمش نكملو و نوريلك شكرا أستاذتنا الغالية في انتظار باقي ابداعاتك
هل من مطبقات لهذا الدرس، أم انه صعب شوي ؟؟؟؟؟؟؟؟ الدرس الثالث جميييل جدا و سهل للغاية ،و غدا ان شاء الله موعده ، ابقوا معي عزيزاتي
السلام عليكم ورحمة الله تعالى وبركاته سلة جميلة وصاحبتها أجمل بارك الله فيك اختي سندس اسفة على ازعاجك ان قلت لك انني لم افهم طريقة عمل le pt d'épine شكرا على المجهود
و عليكم السلام و رحمة الله و بركاته الأجمل مرورك و اهتمامك الأميرة، و لا ازعاج ابدا اسعد بأسئلتكم هاذي صورة اكثر وضوح تبين طريقة عمل le pt d'épine و اي أسئلة أخرى، فلا تترددي
العفو عفاف الخير، شكرا على حضورك الأروع بالنسبة ليد السلة نخدموها بعد ما نكونوا كملنا الزهرات لأن جزء من يد السلة راح يتغطى بيهم و يقعد باين لنا جزء منها فقط و هذه هي يد السلة اللي راهي ظاهرة و اللي رايحين نخدموها ب le point de tige اللي شفناه في الدرس الأول الفرق فقط اننا في السلة رايحين نخدموه بالشريط نتاع الساتان و ليس بالخيط le point de tige هذا هو هنا في الصورة نخدموا بالشريط و نتحصلوا على هاذ اليد اي تساؤل انا جاهزة، يعطيك الصحة عفاف الخير
السلام عليكم راني متأسفة بزاااااااااااااااف وراني زعفانة من روحي بزاااااااااف غبت عن المنتدى ليامات راحو عليا الدروس معليش ولو اني متأخرة بزاااااااااف لكن نحاول قد مانقدر نلحقكم شكرا جزيلاااا سندس الدرس رائع والنتيجة هايلة بزااااااااف
و عليكم السلام و رحمة الله لا عليك لميس، ما راحلكش بزااف دروس، هو درس واحد فقط ثم انا متاكدة انك شاااطرة و قادرة تلحقي ان شاء الله همتك معنا يا لميس
ان شاء الله أختي نلحق بصح انا ثان مافهمتش سواسوا يد السلة ممكن تفهميني كيفاش نلويو الشريط؟؟؟ اسمحيلي بصح ماحبتش تدخل في راسي
بارك الله فيكم على العمل المميز والمجهودات المعتبرة أختي الفاضلة هل تستطيعين تصوير عملك وإرساله هنا لنراه ؟